Vyf redes om in Suid-Afrika te bly

Deur Jaco Kleynhans

Die Suid-Afrikaanse Instituut vir Rasseverhoudinge (SAIRR) het onlangs ? studie bekendgemaak wat aantoon dat meer as 1 miljoen wit Suid-Afrikaners sedert 1994 die land verlaat het. ? Groot aantal van hierdie emigrante is hoogsgeskoolde mense met skaars vaardighede. Daarbenewens is daar na alle waarskynlikheid tans ? paar honderdduisend Suid-Afrikaanse jongmense wat tydelik oorsee is. Die presiese aantal is nie bekend nie, en ook nie hoeveel van hulle dit oorweeg om permanent oorsee te bly nie.

Buiten die groot aantal hoogsgeskoolde wit Suid-Afrikaners wat die land sedert 1994 verlaat het, is daar tans ook ? toename in hoogsgeskoolde Suid-Afrikaners van ander rasse wat oorsee gaan. Dit sluit veral medici, verpleegsters, onderwysers en ingenieurs in.

Die rede waarom wit mense Suid-Afrika vir groener weivelde in ander lande verlaat, kan volgens die studie van die SAIRR grootliks aan misdaad en regstellende aksie toegeskryf word. In die algemeen is beter loopbaangeleenthede teen beter salarisse met beter lewensstandaarde ook ? sterk motiveerder vir Suid-Afrikaners van alle rasse om groener weivelde te gaan opsoek.

Ten spyte van al die probleme in Suid-Afrika is daar vandag meer ryk Suid-Afrikaners van alle rasse as tien of vyftien jaar gelede. Baie mense kry dit dus steeds reg om in Suid-Afrika te bly en hier ? suksesvolle toekoms vir hulself en hul gesinne te skep.

Solidariteit het ondersoek gaan instel na die redes waarom mense in Suid-Afrika moet en kan bly, sonder om lewensgehalte in te boet. Vyf van die redes is:

Geleenthede

 

In 2006 moes Sasol honderde tegnici van Taiwan af invoer om instandhoudingswerk by die maatskappy se aanlegte in Suid-Afrika te kom doen. Talle maatskappye, waaronder Sasol, Kumba Resources en Murray & Roberts Cementation, het verlede jaar spesiale aanbiedinge aan werkers met skaars vaardighede gemaak. Eskom het vroeër vanjaar aangekondig dat hy duisende geskoolde werkers sal moet aanstel om aan die groter vraag na elektrisiteit te voldoen. Talle maatskappye het aangetoon dat hulle sekere poste sal moet vul sonder om regstellende aksie in ag te neem, omdat daar eenvoudig nie kandidate is om die poste te vul nie. Dit alles beteken dat daar wel nog goeie geleenthede in Suid-Afrika beskikbaar is. Iemand wat oor die regte vaardighede beskik, of oor die wil om ? sakegeleentheid te identifiseer, kan steeds in Suid-Afrika sukses behaal.

Ontwikkeling

 

Suid-Afrika word as ? ontwikkelende land beskou. Dit beteken dat die land se ekonomie tans nog ontwikkel om tot op dieselfde vlak as eerste wêreldekonomieë te vorder. Ontwikkelende lande het baie keer hoër ekonomiese groeikoerse omdat sulke lande se natuurlike hulpbronne nog nie ten volle benut word nie en omdat produktiwiteit steeds besig is om te verhoog. Dit beteken dat daar vir entrepreneurs in ? land soos Suid-Afrika geweldig baie geleenthede bestaan om nuwe produkte of dienste beskikbaar te stel. So byvoorbeeld beplan Eskom om oor die volgende paar jaar talle nuwe kragstasies te bou. Dit sal beteken dat daar in die gebiede waar die kragstasies gebou gaan word, talle behoeftes aan dienste en produkte sal ontstaan. Alles gaan daaroor of mens ? geleentheid kan raaksien en dit benut.

Die land

 

? Derde rede waarom mense in Suid-Afrika moet aanbly het natuurlik te doen met wat die land jou kan bied. Goeie weer, byna geen natuurrampe nie en pragtige natuurskoon is maar net ? paar van die dinge waarna mense verlang as hulle die land verlaat het. Dit alles dra natuurlik ook by tot mense se lewensgehalte.

Ons taal, kultuur, geloof en familie

 

Suid-Afrika bied steeds aan sy inwoners ? ryke kultuurbelewenis. Suid-Afrikaners het ook ? kuierkultuur soos min. Tussen al die musiek, feeste en lekker restaurante en die geleentheid om saam met jou familie en vriende vleis te braai en rugby te kyk, het ons steeds ? kultuurbelewenis wat min ander lande kan bied. Suid-Afrikaners het ook steeds die geleentheid om baie vrylik aan geloofsaktiwiteite deel te neem. Omdat die grootste gedeelte van Suid-Afrika se bevolking hulself Christene noem, is daar veral vir Christene ? baie goeie atmosfeer om hul geloof in uit te leef. Suid-Afrika het ook steeds ? sterk familie-ingesteldheid, waar die gesin en groter familie steeds baie belangrik is. Emigrante kan hierdie ondersteuning verloor.

Daai iets wat ons Suid-Afrikaners maak

 

Vra maar vir meeste Suid-Afrikaners wat geëmigreer het en daarna weer na Suid-Afrika teruggekeer het en meeste sal vir jou sê dat dit daardie iets is wat hulle gemis het. Daardie iets het natuurlik met Suid-Afrikaanswees te make. Ons Suid-Afrikaners het al ? kultuur van ons eie ontwikkel en daarom is dit nie altyd vir ons maklik om in ander lande aan te pas nie.

Dit is waar dat daar vandag baie negatiewe dinge in Suid-Afrika is. Misdaad, regstellende aksie, hoë brandstof- en kospryse, ? tekort aan elektrisiteit is maar ? paar. As mens egter hierdie kwessies en hulle regstreekse uitwerking op mense teen die voordele opweeg wat ons land vir sy mense inhou, dan moet dit steeds swaarder weeg om in Suid-Afrika te bly. Die meeste krisisse wat ons tans beleef is van ? tydelik aard en kan wel oor die langtermyn opgelos word. Ons moet dus nie hoop in ons toekoms verloor nie, maar moet eerder saamspan om vir onsself ? toekoms hier te skep.